Home » Issuances » DepEd Memoranda » Buwan ng Wikang Pambansa 2019 Tema at Paksa

Buwan ng Wikang Pambansa 2019 Tema at Paksa




Ang Komisyon sa Wikang Filipino (KWF) ay mangunguna sa pagdiriwang ng Buwan ng Wikang Pambansa 2019 mula ika-1 hanggang ika-31 ng Agosto alinsunod sa itinakdang Pampanguluhang Proklamasyon Big. 1041, s. 1997.

Buwan ng Wikang Pambansa 2019 Tema

Bilang tugon sa proklamasyon ng UNESCO na International Year of Indigenous Languages (Pandaigdigang Taon ng mga Katutubong Wika) ang taong 2019, pinagtibay ng KWF ang Kapasiyahan ng Kalupunan Big. 18-31 na naglalayon na masiglang lumahok ang KWF sa pagdiriwang na ito; at ang Kapasiyahan ng Kalupunan Big. 19-03 na nagtatakda ng temang Wikang Katutubo: Tungo sa Isang Bansang Filipino at naglalayon na ilaan ang Buwan ng Wika sa Agosto bilang lunsaran ng mga pagpupunyagi para sa mga katutubong wika sa bansa.

Ang layunin ng pagdiriwang ay ang mga sumusunod:

a. maiangat ang kamalayan ng mga mamamayang Filipino ukol sa halagang multilingguwalismo sa paglikha ng isang bansang Filipino na may pagkakaunawaan;




b. mahikayat ang mga mamamayang Filipino, lalo ang mga may-ari ng katutubong wika, na makilahok sa mga gawaing pangwika ng KWF;

c. mahikayat ang mga mamamayang Filipino na magpatupad ng mga malikhaing programang pangwika na makatutugon sa pangangailangan ng kanilang komunidad sa pakikipagtulungan sa KWF;




d. mapangalagaan ng KWF ang mga karapatang pangwika ng mga mamamayan sa pamamagitan ng pagpapatupad ng mga patakarang magbibigay ng seguridad laban sa mga diskriminisasyong pangwika; at

e. maipakilala sa mga mamamayang Filipino ang KWF bilang ahensiya ng pamahalaan na nangangalaga sa mga katutubong wika ng Pilipinas sa pamamagitan ng mga programang pangwika nito.

Ang lingguhang paksa sa loob ng isang buwang pagdiriwang ay ang mga sumusunod:

PetsaTema
Agosto 5-9, 2019Ako at ang Katutubong Wika Ko
Agosto 12-16, 2019Pagbasa at Paglaya: Pagpapalusog ng mga Katutubong Panitikan at Kaalamang-bayan
Agosto 19-23, 2019Sarikultura: Multilingguwalismo at Paguugnayan para sa Isang Bansang Filipino
Agosto 26-30, 2019Pangangalaga sa mga Katutubong Wika, Pangangalaga sa Bansang Filipino

Kalakip ng Memorandum na ito ang Palatuntunan ng mga Gawain para sa isang buwang pagdiriwang.




Para sa mga karagdagang impormasyon, maaaring makipag-ugnayan sa

Komisyon sa Wikang Filipino, Sangay ng Edukasyon at Networking, Gusaling Watson, 1610 JP Laurel St., Malacanang Complex, San Miguel, Maynila sa telepono: (02) 736-2519; o email: [email protected] at website: www.kwf.gov.ph.

Hinihiling ang malawakang pagpapapalaganap ng Memorandum na ito.

LEONOR MAGTOLIS BRIONES
Secretary

1 thought on “Buwan ng Wikang Pambansa 2019 Tema at Paksa”

  1. Wika Mo at Wika Ko ay ‘Di Basta Wikang Filipino
    Rowena Serrano-Taway

    Wika mo at wika ko ay ‘di basta wikang Filipino
    Wika mo at wika ko ay likas nating wikang katutubo
    Wikang pamana ng ating lahi
    Wikang panangga sa mapang-aglahi

    Ito ay ang ating pagkakakilanlan
    Unang wikang ating natutunan
    Katutubong wika mula kapanganakan
    Wika daan tungo sa kapayapaan

    Wika mo at wika ko ay ‘di basta wikang Filipino
    Yaman ang taglay ng gumagamit nito
    Wikang ating-atin, ipinagmamalaki ko
    Saan man pumaroon, ako’s taas noo kahit kanino

    Bigyang pagpapahalaga
    Ito’y ating kaluluwa kumbaga
    Ating tunay, talaga!
    Ipangakong pagyayamanin at pauunlarin, sa bato’y itaga!

    Wika mo at wika ko ay ‘di basta wikang Filipino
    Kalayaan ng bayan ang katumbas nito
    Kailan man ay ‘di maglalaho
    Dumaan man sa matinding bagyo’t balaho

    Gamitin. Gamitin nang gamitin
    Isabay mo na sa panalanging taimtim
    Ipagsigawan mo’t wag nang ilihim
    Pagkat kung mamamatay ang wika’y hatid ay dilim

    Wika’y bahagi ng ating kultura
    Kailanman ay hindi mabubura
    Ulanin man ng mura’t lura
    Kung ang wika’y wala, pagkakaisa’y nakasara

    Wika mo at wika ko ay ‘di basta wikang Filipino
    Gamitin sa saliksik, katumbas ay talino
    Pagyaman at pag-unlad nito’y para ba kanino?
    Gamitin at yakapin nang ‘di tayo nakasunod sa anino ng kung sino

    Itatak at sa puso’y ikintal
    Ang halaga at gampanin nitong mala-Kristal
    Kung balewalain, ito’y isang sampal
    Nararapat pang isakdal

    Wikang katutubo: Tungo sa isang bansang Filipino
    Wikang magbubuklod sa isang hukbo
    Wikang magtutulak sa isang takbo
    Wikang tagumpay ang sinisimbolo!

    Wika mo at wika ko ay di basta wikang Filipino
    Wikang Filipino’y kailanman ay ‘di maglalaho
    Bitbit nito’y pag-asa’ty buhat ng kulturang Pilipino
    Wika mo at wika ko’y wikang katutubo
    Wikang tatak ng mga Pilipino!

Leave a Reply

Scroll to Top