Proportional Vacation Pay

0

Lahat ng empleyado ng gobyerno ay may karapatan sa LEAVE PRIVILEGES. Ang Leave of absence ay isang karapatan na itinalaga sa atin na mga nanunungkulan sa gobyerno sakaling mangailangan tayong lumiban sa trabaho. Ayon sa Omnibus Rules on Leave ( Rule XVI of the Omnibus Civil Service Rules), ang bawat empleyado ay binibigyan ng 15 days na vacation leave at 15 sick leave na may buong bayad. Ang kabuuang 30 days leave na ito ay pwedeng magamit sa loob ng isang taon upang kahit nagkaroon ng absent, hindi mababawasan ang sweldo. Kung di man magamit, ito ay naiipon.

Tayong mga guro ay hindi isinali sa ganitong usual vacation and sick leave credits. Sa halip, tinawag itong proportional vacation pay (PVP) na katumbas ng sweldo ng mga teaching personnel sa Christmas at summer vacation na kinukwenta base sa kung ilang araw sila pumasok sa loob ng school year (Rule XVI of the Omnibus Civil Service Rules, Sec 6). Kapag walang absent, buong natatanggap ang sweldo sa April at May. Pag may absent sa loob ng school year, ito ay may bawas proportionally. Bawat taon ay may standard na basehan ng factor kung ilan ang buong PVP. Kalimitang ginagamit halimbawa ang 3:1, sa bawat 3 araw na absent, may isang araw na kaltas sa PVP. Kung sa kalagitnaan ng taon ka lang nakapag serve, maaring kalahati lang din ang matatanggap na PVP.

May mga pagkakataon na tayo ay required na magbigay ng serbisyo beyond our official time. Nakasaad ito sa RA 4670 Art III Sec. 14. Sa halip na overtime payment in legal tender equivalent to 1.25% of daily rate ang ibayad, ang ibinibigay ay ang tinatawag na “SERVICE CREDIT” na katumbas ng isang araw na sweldo (nawala na ang 25%). Ang service credit ay hindi basta basta nakukuha (DepEd Order 53 s. 2003). May mga proseso para mabigyan tayo nito gaya ng Special Order. Ang mga service credit na ito ay maaaring ipangtapat sa mga absences na ang dahilan ay kung may sakit tayo o ang miyembro ng ating pamilya. Hindi nagagamit ang service credit kung ang type ng absent na inapply ay “vacation”.

Kung ang ibang empleyado ay may vacation leave na may buong bayad, tayong mga guro ay wala dahil po sa PVP. Kung wala tayong service credits, may sakit man o wala ang naging dahilan ng pag absent, ang mga araw na absent tayo ay Leave of Absence Without Pay (LAWOP). May kalatas sa buwan na nag absent, mayroon ding kaltas sa PVP. Kaya nga po nagkaroon na tayo ng kasabihang bawal magkasakit kung walang service credits.

Ang ating tinatanggap na PVP ay isang benepisyo katumbas ng ibinibigay din ng gobyerno sa lahat ng government workers sa buong pilipinas. Ang kaibahan nga lang po, maraming government workers ang may confusion sa ating tinatanggap na PVP at itinuturing na mas nakalalamang tayo sa kanila. Kung tutuusin, sila yung pwedeng mag absent na may bayad, maaari pa silang mag monetize, sila rin ang may tinatawag na forced leave (max of 5 days) na pwede nilang ienjoy. Samantalang tayo ay nakasalalay sa kung ilang service credits ang puhunan natin para magkaroon ng leave with pay na pwede lang iapply kung tayo ay may sakit. Bukod sa bawas sa monthly salary, bawat LAWOP natin ay may kaukulang epekto sa sweldo ng bakasyon, pati na rin sa terminal leave at IPCRF rating.

Ngayon, nararapat po bang ipatanaw sa atin na utang na loob ang ating tinatanggap na sweldo tuwing bakasyon? Nararapat din po ba na masabihan tayo na magpasalamat dahil binabayaran tayo habang nasa bakasyon? Nababawasan po ba ang ating dedikasyon sa ating propesyon kapag tayo ay magbakasyon ngayong April at May?

Alam po nating lahat na ang ating pagiging guro ay hindi lang natatapos ng alas singko ng hapon sa loob ng isang academic year. Hindi tayo dapat magkaroon ng guilt feeling at isiping hindi tayo karapatdapat na magbakasyon. Kung kaya nga, sa akin pong pananaw, we should not spend summer break justifying why we deserve this time off, or telling people how much work we do.

Leave A Reply

Your email address will not be published.